Uburyo bwo guhuza igitsina bwatuma umugore asama

 

Abahanga mu bijyanye n’ubuzima bw’imyororokere, bemeza ko atari uburyo (position) bubonetse bwose bwo gukora imibonano mpuzabitsina bworohereza uwifuza gusama kubigeraho.

Umwe muri aba bahanga Dr Marilyn Glenville mu bushakashatsi bwe yagaragaje ko ku mugore wifuza gusama, imibonano mpuzabitsina ikorwa mu gihe cy’uburumbuke (Fertile period), aho umugore aba agomba kuryama agaramye maze umugabo akaba ari we ujya hejuru.

Uyu muganga asobanura ko mu gihe umugabo ari hejuru y’umugore, igitsina cye cyinjira nta nkomyi kikagera kure mu nda ibyara y’umugore iba ifungutse neza, bigatuma cyegera umuyoboro uboneza ku ntanga ngore, maze mu gihe cyo gusohora k’umugabo bigatuma intanga ze zihuta zisanganira intanga ngore, bigahura bigakora urusoro ruzatanga umwana.

Ibi ngo bitandukanye n’ubundi buryo bunyuranye bwo gukora imibonano mpuzabitsina; nko kuba umugore yajya hejuru y’umugabo, kwicara cyangwa se guhagarara, kuko ubu buryo bwo bushobora gukora umupaka ubuza intanga ngabo inzira yo kujya guhura n’iy’umugore, aho zitisanzura mu rugendo rwazo zijya gutera inda, aha ngo akaba ari na ho usanga kenshi izi ntanga ngabo zangirika zikameneka hanze y’inda ibyara.

Ni mu gihe nyamara ngo inda ibyara yakira neza intanga ngabo ikanazihamana mu gihe umugore aryamye agaramye, bityo ngo na nyuma y’imibonano, izi ntanga zakiriwe n’inda ibyara zishobora kubonekamo itanga umusaruro, mu gihe izatambutse mbere zaba zahuye n’inzitizi ituma zidashyikira intanga ngore.

Dr Marilyn yabwiye Daily Mail ati “Abakora imibonano mpuzabitsina bashobora kubikora mu buryo butandukanye mu gihe ari ukwishimisha bisanzwe, ariko si uburyo bubonetse bwose bwafasha mu gihe bifuza umusaruro w’uruhinja muri iki gikorwa […], igipimo cy’imiryango yabuze urubyaro irarushaho kwiyongera kuko batazi uburyo bwiza bworohereza nyababyeyi kwakira umwana.”

Uretse kujya hejuru k’umugabo, ngo kuba umugabo yaturuka inyuma y’umugore bapfukamye nabyo byatanga umusaruro, ariko bikaba mu gihe umugabo asumba umugore gusa, kuko bifasha umugabo kuboneza neza mu nda ibyara y’umugore aho umuyoboro wayo uba usa n’ucuramye bityo akinjira neza kandi intanga zikihuta, mu gihe iyo bareshya ngo umuyoboro w’inda ibyara uba utambitse, bityo umugabo yasohora intanga ntizive aho ziri ngo zijye gushakisha aho ingore iri.

Ikindi uyu muganga agaragaza mu bushakashatsi bwe, ni uko abifuza gusama baba bakwiye kwitondera ibijyanye n’imirire yabo, by’umwihariko kwirinda ikawa n’ibisindisha niba bishoboka, cyangwa se kugabanya kubinywa.

Ubundi bushakashatsi nk’ubw’abahanga mu binyabuzima, Robin Baker na Mark Bellis, bwo bwagaragaje ko kurangiza k’umugore mu gihe cy’imibonano, nabyo byongera ubushobozi bwe bwo gutwita, gusumba igihe umugore atabashije kurangiza.

Umuganga w’indwaza z’abagore mu Rwanda na we yagize icyo abivugaho

Kimwe n’ubu bushakashatsi, aganira na IGIHE, Dr Iba Mayele, na we yemeje ko atari buri buryo bwose bwo gukora imibonano mpuzabitsina bufasha gusama.

Aha yagize ati “Uburyo buzwi hose (standard) bufasha gusama, ni mu gihe umugore aryamye agaramye, umugabo akajya hejuru […].”

Icyakora yongeraho ko mu bo yakira, nta wigeze amugana asaba inama ku buryo (position) bwo gukora imibonano mpuzabitsina bwamufasha kubona umwana, dore ko ngo ubwo buryo busanzwe bukoreshwa na benshi.

Ku bijyanye n’imirire y’abifuza gutwita, Dr Iba yemeranya n’iby’ubu bushakashatsi buvugwa mu bika bya mbere by’iyi nkuru, aho agira ati “Ibisindisha, ikawa n’ibiyobyabwenge bigira ingaruka ku bushobozi bw’umugore bwo kubasha gusama.”

Avuga ko mu gihe ibi byabaye byinshi mu maraso y’umugore, bishobora kugera ubwo nyababyeyi yiremamo imisemburo isa n’uburozi bwangiza intanga ngabo, bityo akaba atagishoboye gusama.